Ō tāpuitanga me Whānau Āwhina

Kia rēhita koe ki Whānau Āwhina, ka kite mātou i tō whānau mō ngā tāpuitanga Tamariki Ora mai i te wā e piripoho ana tō pēpi tae atu ki te rima tau. Ka waea atu tā mātou kāhui atawhai ki a koe i te wā i rēhita koe, ki te whakarite i ō toronga tuatahi.

Ka whai mātou i te tikanga ā-kāhui hei manaaki i a koe, nō reira ka kite pea koe i tētahi nēhi o Whānau Āwhina, kaimahi hauora rānei (Kaiāwhina Whānau Āwhina, Karitane ā-Hapori rānei), e ai ki ngā take e hiahia ana koe kia kōrerotia, ngā tautoko rānei e hiahiatia ana.

He maha ngā huarahi e kite ai koe i a mātou: ka tae atu mātou ki tō kāinga, ka tūtaki ki tētahi o ō mātou whare haumanu tūtata, ki tētahi atu wāhi rānei pērā i te marae. Ka kite hoki i a koe i tētahi tāpuitanga ataata. Ka whakarato mātou i ngā toronga tāpui me ngā whare haumanu toronoa ki ngā wāhi maha.

I raro i te kaupapa Tamariki Ora a te Manatū Hauora, ko te tikanga ka tū ngā toronga ina eke te pakeke o tō tamaiti ki te:

• 4-7 wiki
• 8-12 wiki
• 3-4 marama
• 5-8 marama
• 9-14 marama
• 15-23 marama
• 2-3 tau;
• 4 tau (te B4 School Check – e wātea ana tēnei ki Whānau Āwhina i ētahi rohe, ki ētahi atu kaiwhakarato, tō Rata/kaiwhakarato hauora rānei).

I tua atu i ēnei toronga, mā mātou hoki e whakarite tāpuitanga āpiti mō ngā tautoko anō mō ngā kaupapa pērā i te tīmata ki te kaimānga, te whāngai ū, me te tautoko moe.

Ka āhei hoki koe ki ngā ratonga mariko koreutu, tae atu ki ngā akoako whāngai ū me te tautoko moe, ahakoa te wā. E wātea ana hoki ngā nēhi o Whānau Āwhina i te ao, i te pō, mā te waea, mō ngā tohutohu me ngā tautoko – waea mai ki a mātou ki 0800 933 922.

He arawātea ia toronga o Whānau Āwhina ki te kōrero mō ngā mea pai, me ngā āwangawanga, ki te tono āwhina hoki mēnā e māharahara ana koe, tō whānau rānei. Kei konei tō kāhui Whānau Āwhina hei taituarā, hei hoa haere hoki mōu i runga i tō ara tiaki tamariki.

Ko ngā āhuatanga pea o ō tāpuitanga:

• te tautoko kia urutau ki ngā mahi tiaki tamariki
• ngā mōhiohio ā-whanaketanga me ngā inenga (pērā i te taumaha, tāroa, nui o te māhunga) o tō tamaiti
• te kōrero mō te whāngai, moe, kori, me te whanaketanga i ia pakeke, kaupae hoki, tae atu ki ngā āhuatanga ka whai ake, ā, me pēhea te tautoko i te whanaketanga o tō tamaiti
• ngā mōhiohio mō te taiora, te tautoko whāngai ū, me te tīmata ki te kaimānga
• te moe haumaru, me ngā mōhiohio me ngā tohutohu whakatau pēpi
• ngā mōhiohio hauora niho me te tautoko kia pai ai te hauora o ngā niho o ō tamariki
• ngā mōhiohio mō te tiaki i ō tamariki me tō whānau kia noho haumaru, kia noho ora, kia kaua hoki e whara
• te pātai mō tō āhua me ō mahi tiaki tamariki, me te tautoko i tō hauora hinengaro mēnā e hiahiatia ana
• ngā mōhiohio me ngā tohutohu mō te hauora pēpi, tamaiti hoki
• ngā tuku awhikiri e wātea ana ki tō tamaiti me te whakautu i ngā pātai mō ēnei
• ngā tautoko ki te kimi ara i te pūnaha hauora, te hono i a koe ki ētahi atu kaiwhakarato me ngā ratonga o tō hapori i te wā e hiahiatia ana.

Ki te tāpui, te whakarerekē rānei i tētahi tāpuitanga Whānau Āwhina, waea koreutu atu ki tā mātou rōpū whakahaere ki 0800 184 803, Mane – Paraire mai i te 8.30am-4.30pm, īmēra rānei ki tō whare haumanu tūtata.

Ki te hiahia tautoko koe i waenga i ngā tāpuitanga, mēnā rānei he pātai āu mō te tiaki tamariki, hauora tamaiti, whanaketanga rānei, whakapā atu ki tō whare haumanu tūtata, waea rānei ki PlunketLine i te ao, i te pō ki 0800 933 922 ki te kōrero ki tētahi nēhi rēhita.

I pahika tētahi toronga, kei te hiahia rānei kia tāpuitia anō? Kaua e māharahara – me whakapā noa mai ka whakarite wā anō māu.

Rapua tō whare haumanu Whare Āwhina tūtata

Ka akiaki mātou i ngā kaitiaki katoa (arā ngā hoapiri, tīpuna, me ētahi atu o te whānau) kia whai wāhi mai ki te toronga Whānau Āwhina.

E whai take ai tō tāpuitanga, me hari mai koutou ko tō whānau i:

• Te pukapuka Tamariki Ora, 'My Health Book' a tō tamaiti. Mēnā ka whai wā i mua i tō toronga, he pai kia pānui koe i ngā pātai kei te tīmatanga o te wāhanga mō te pakeke o tō tamaiti, mō tōna kitenga me tōna rongona.
• Ngā pātai katoa, ngā māharahara rānei hei kōrero māu. Ka hiahia pea koe ki te tuhi i ēnei ki te wāhi tuhipoka o te pukapuka, hei āwhina ki te ārahi i ngā kōrero me te whakarite kia kōrerotia ngā kaupapa whai take ki a koe. Kia maumahara, tukuna ngā pātai katoa, ahakoa te pātai!
• Kope, taonga tākaro, kākahu tuhene – ngā mea katoa kia pai ai te noho a tō whānau me tō pēpi.

He aha te tāpuitanga Whānau Āwhina?

He hihira hauora Tamariki Ora koreutu hei tautoko i te tipuranga me te whanaketanga o tō tamaiti mai i te whānautanga ki te rima tau, ka tautoko hoki kia puāwai te whānau.

Āhea taku toronga Whānau Āwhina tuatahi?

I waenga i te 4 me te 6 wiki i muri i te whānautanga o tō pēpi.

E hia te roa o te toronga Whānau Āwhina?

Ka āhua 30 meneti ki te 1 haora te roa o te noho tahi ki a koe me tō tamaiti, kei te āhua o ngā hiahia o tō whānau me tō tamaiti. Ka āhua roa ake pea te toronga tuatahi, kia pai ai tā mātou whakawhanaunga ki a kōrua ko tō pēpi, me te whakautu i ō pātai mō te ratonga.

Ka āhua roa ake hoki te tāpuitanga mō te B4 School Check.

Me haere au ki tētahi whare haumanu?

E whai ana mātou ki te tuku i te ratonga ngāwari e ai ki ō hiahia. Ko te tikanga, kei tō kāinga te toronga Whānau Āwhina tuatahi, ā, ko ngā toronga o muri ki tō whare haumanu tūtata, ka tūtaki rānei ki a koe ki tētahi atu wāhi pai pērā i te marae.

Ka tuku hoki mātou i ngā ratonga mariko mēnā he māmā ake mōu. Kōrero ki tā mātou kāhui mō te tikanga pai mā koutou ko tō whānau.

He koreutu te Whānau Āwhina? Me kirirarau o Aotearoa, kainoho rānei?

He koreutu ngā toronga Tamariki Ora a Whānau Āwhina ki ngā whānau katoa i Aotearoa he tamariki ā rātou, e rima tau te pakeke, i raro iho rānei. Ehara i te mea me kirirarau, me kainoho rānei o Aotearoa e rēhita ai koe.

Me aha mēnā ka pahika i a au tētahi toronga Whānau Āwhina?

Waea mai ki a mātou ki 0800 184 803. Ahakoa te roa o te wā me hono mai anō.

Me whakapai ahau i taku whare i mua i te toronga a Whānau Āwhina?

Kāo, e kore koe e mate ki te whakapai whare – kei konei mātou ki te tautoko i a koutou ko tō tamaiti, tō whānau hoki, kaua ki te whakawā i te āhua o tō kāinga! E mōhio ana mātou he taumaha te tiaki tamariki i ētahi wā (inarā i te wā e piripoho ana tō pēpi). Ka hiahia noa mātou i tētahi wāhi wātea, papatahi hoki ki te ine i te taumaha me te tinana o te pēpi, me tētahi wāhi ki te noho tahi ki te kōrero i te āhua o te haere o te tiaki pēpi.

Mēnā he kurī, he mōkai rānei tāu, e tono ana hoki kia herea ki wāhi kē (arā ki rūma kē, ki waho rānei) i te wā o te toronga. Ka taea e tō kāhui Whānau Āwhina te waea atu i mua i te toronga ki te whakarite i tēnei mēnā he pai tērā.

Ka aha mēnā e moe ana taku pēpi i te wā o te toronga a Whānau Āwhina?

Kei te pai noa iho, ka pērā noa pea te pēpi i te wā o te toronga. Ka kōrero mātou ki a koe mō te āhua o te haere o te tiaki pēpi, i te pēpi e moe ana, ā, mēnā kāore e pai ki a koe te whakaoho i te pēpi, te tango kākahu rānei kia ine i te taumaha, ka whai wā anō ki te tuhi i aua mōhiohio ā tōna wā. Ka taea e mātou te whakarite toronga anō mēnā e hiahiatia ana.